PETERS ANOMALİYASI (KLİNİKİ HAL)

Xülasə

Peters anomaliyası nisbətən şəffaf periferik buynuz qişa və buynuz qişanın mərkəzi bulanması ilə xarakterizə olunan nadir anadangəlmə xəstəlikdir. Dovşan dodaq, qurd ağızlıq, qısa boy, anormal qulaqlar və əqli qüsur kimi əlaqəli sistem anormaliyaları da yanaşı rast gəlinir. Peters anomaliyasında nistaqm, mikrokornea, kornea plana və ön kamera bucağı disgenezi səbəbindən qlaukoma ola bilər. Bu uşaqlarda qüzehli qişa anomaliyaları, xorioretinal koloboma, retinal displaziya, davamlı hiperplastik birincili vitreus, görmə sinirinin hipoplaziyası, koloboma və ptoz da rast gəlinir. Peters anomaliyasının müalicəsi penetrativ keratoplastikadır, lakin donor toxumanın bulanması riski yüksəkdir. Xəstələrin əhəmiyyətli bir hissəsində qlaukoma və ambliopiya inkişaf edir.

Məqalədə 2018-2023-cü illər ərzində akad. Zərifə Əliyeva adına Milli Oftalmologiya Mərkəzinə Peters anomaliyası ilə 12 xəstə müraciət etmişdir. Onlardan bəziləri klinik hallar şəklində təqdim edilmişdir. Təqdim edilən xəstələrdə anomaliyanın I və II tipləri təsvir edilmişdir. Bəzi xəstələrin valideynləri birincili dərəcəli qohum idilər, 2 xəstə katarakta səbəbindən əməliyyat olunmuşdur və bütün xəstələr qlaukoma riski səbəbindən oftalmoloq müşahidəsində saxlanılır. Peters anomaliyası olan xəstələrin diaqnozu və müalicəsində peşəkar mütəxəssislərin qrup şəklində işinin vacib olması vurğulanır