KERATOKONUSUN MÜALİCƏSİNDƏ CONTOURA VİSİON TOPO-GUİDED FOTOREFRAKTİV KERATOEKTAMİYANIN KROSSLİNKİNQ İLƏ BİRGƏ TƏTBİQİ
Açar sözlər:
keratokonus, buynuz qişa, topo-guided PRK, krosslinkinqXülasə
Məqsəd - Contoura Vision Topo-guided fotorefraktiv keratoektomiya - CVTG - PRK+CCL üsulunun keratokonusun müalicəsində qiymətləndirilməsi.
Material və metodlar
Akad. Zərifə Əliyeva adına Milli Oftalmologiya Mərkəzinin eksimer lazer söbəsində müayinədən keçən, yaşları 18-26 yaş arası dəyişən, 20 xəstə (30 göz) müşahidəyə alınmışdır. Xəstələr iki grupa ayrılmışdır: 10 xəstə (15 göz) üzərində standart Wavefront Optimized (I qrup) üsulu ilə Standart PRK+CCL, 10 xəstə (15 göz) üzərində isə CVTG-PRK+CCL (II qrup), cərrahi əməliyyatları icra olunmuşdur. Bütün xəstələrə ənənəvi oftalmoloji müayinələrlə yanaşı buynuz qişanın vəziyyəti qiymətləndirilmişdir (WaveLight® ALLEGRO Oculyzer™ (ALCON, ABŞ) və WaveLight® ALLEGRO Topolyzer™ (ALCON, ABŞ)). Bütün xəstələr əməliyyatdan 1 və 6 ay sonra tədqiq edilmişdir. Xəstələrin əməliyyatdan öncə və sonra görmə itiliyi, rəng duyğusu və stereopsis görməsi də qiymətləndirilmişdir.
Nəticə
Müşahidəyə alınan CVTG-PRK+CCL cərrahi əməliyyatlı icra olunan xəstələrin 80%-də əməliyyatdan sonra görmə itiliyi 20/40 göstərmişdir. Standart PRK+CCL cərrahi əməliyyatından sonra bu göstərici 50% təşkil etmişdir. I qrup pasiyentlərdə əməliyatdan sonra orta astiqmatizm 3.14±1.56D-dan 2.51±1.75D-a, II qrupda isə – 3.14±1.56D-dan 2.10±1.67D-ya endirilmişdir. I qrupda orta sferik ekvivalent -2.51±3.48D-dan -1.25±2.75D-ya, II qrupda isə – 2.51±3.48D-dan -0.65±2.08D-yə qədər yaxşılaşdırılmışdır. Rəng duyğusu və stereopsis görmənin üstünlüyü də qruplar arasında fərqli olmuşdur: I qrupda 60% pasiyentlərdə, II qrupda isə 75%-də yaxşılaıma ilə ozünü büruzə vermişdir. Bu üsuldan sonra xəstələrin ışığa həssaslığı, gecə görmənin pisləşməsi hissiyyatı və parıltılı görmə, halo efekti kimi çətinlikləri də azalmışdır.
Yekun
Alınan nəticələr CVTG-PRK+CCL cərrahi əməliyyatının keratokonuslu gözlər üçün efektiv və təhlükəsiz olduğunu göstərdi. Bu müalicə üsulu görmə qabiliyyəti az olan kontakt linza istifadə edə bilməyən keratokonus xəstələri üçün ən alternativ yoldur.
